Арав хоног гэдэг дотоод сэтгэлийнхээ гүнд нэвтрэн орж буглаа болсон хир буртаг нисваанисуудыг үндсээр нь арилгахад мэдээж хангалттай хугацаа биш. Гэсэн ч бусдаас тусгаарлагдмал байж бясалгалаа тасралтгүй хийх нь үр дүнд хүрэх амжилтын үндэс болдог. Бясалгалын дүрэм горим ч үүнд л зориулагдсан юм. Дүрэм горим нь багш хийгээд бясалгалыг зохион байгуулагчдын тусын тулд байдаггүй. Мөн ямар нэгэн шашны мухар сүсэг биш билээ. Бясалгал хийдэг хэдэн мянган хүний олон зуун жилийн турш хуримтлуулсан туршлага дээр тулгуурлан бүтээгдсэн дүрэм горимыг чандлан мөрдсөнөөр бясалгалын таатай уур амьсгалыг бүрдүүлж байдаг бол түүнийг зөрчих нь бясалгалын таатай ур амьсгалыг бохирдуулж орхидог.
Бясалгагчид 10 хоногийн турш бясалгах ёстой. Үүнээс гадна бусад дүрэм горимуудыг сайтар уншиж танилцахыг зөвлөе. Бясалгалын дүрэм горимыг шударгаар чандлан мөрдөж чадна гэдэгтээ итгэлтэй байгаа хүмүүс л бясалгалд суух зөвшөөрөл хүсэх хэрэгтэй.
Үнэн сэтгэлээсээ хичээн бясалгал хийхгүй хүн бусдад саад болоод зогсохгүй өөрийн үнэт цагийг ч давхар үрэх болно. Бясалгалд суухаар ирсэн хүмүүст бясалгалын дүрэм горим хатуу санагдаж бясалгалаа дуусгалгүй дундаас орхин явах нь таагүй төдийгүй өөрт тань хор нөлөөтэй гэдгийг сануулах нь зүйтэй юм. Түүнчлэн олон дахин сануулсаар байхад дүрэм горимыг мөрдөхгүй байснаас болж таныг явахыг шаардахад хүрэх нь үнэхээр азгүй хэрэг болох билээ.
Бясалгалын туршид лаа, арц хүж асаах эрхээр маань тоолох, тарни унших залбирал үйлдэх зэргийг хориглоно. Бусад бясалгалын аргуудыг сайлж муулалгүйгээр 10 хоногийн турш хойш нь тавих хэрэгтэй. Ингэснээр та бүх анхаарлаа Випашяна бясалгалд хандуулж түүнийг шударгаар цэгнэн үзэх боломжтой болно. Бясалгагчид Випашяна бясалгалтай хамт ямар нэгэн өөр төрлийн бясалгалыг холихыг тэвчих хэрэгтэй. Багш олон удаа сануулсан хэдий ч Випашяна бясалгалтай хамт өөр төрлийн шашны зан үйлийг хольж хутган өөртөө хор хохирол учруулсан тохиолдол гарч байсан удаатай. Тиймээс бясалгалд суухаар ирсэн хүмүүс багшийн заасан зааврын дагуу түүнд юуг ч нэмэхгүй, юу ч хасалгүйгээр ёсчлон дагаж бясалгах хэрэгтэй юм. Ямар нэгэн эргэлзэх асуух зүйл гарваас зөвхөн багшдаа хандан тодруулж болно.
Хэдийгээр иогийн болон биеийн тамирын дасгал Випашяна бясалгалын үед хийж болох боловч бясалгалын орчинд дасгал хийх тохиромжтой газар байхгүй учир зөвхөн алхах дасгал хийх боломжтой.
Бясалгалын талаар эргэлзээтэй асуудлыг зөвхөн багшаас тодруулан асууж болно. Үдийн 12-13 цаг , оройн 9-9:30 цагийн хооронд болон завсарлагааны цагуудад багшаас тодруулга авч болно. Эдгээр цагийг зөвхөн бясалгалын холбогдолтой асуултад зориулах бөгөөд гүн ухааны цэцэрхэл маргаанд зориулагдаагүй гэдгийг ойлгох хэрэгтэй.
Бясалгагчид эхний өдрөөс эхлэн 10 дахь өдрийн өглөөний 10 цаг хүртэл юм ярихгүй нам гүм байх горимыг чандлан мөрдөх хэрэгтэй. Нам гүм байна гэдэг нь бие, хэл, сэтгэлээрээ нам гүм байхыг хэлнэ. Дохио зангаагаар, бичиг цаасаар, үйл хөдөлгөөнөөрөө бусад бясалгагч нартай харилцахыг тэвчих хэрэгтэй. Гэсэн хэдий ч бясалгагчид хэрэгтэй бол хэдэн ч удаа багштай уулзаж эргэлзээтэй асуудлаа лавлаж болно. Мөн орон байр хийгээд хоол унд зэрэгтэй холбоотой асуудлуудыг бясалгал зохион байгуулж буй хүмүүстэй уулзан шийдэж болно. Гэхдээ олон дахин уулзахгүй байхыг хичээх хэрэгтэй.
Бясалгалын төвд эрэгтэй эмэгтэйгээр тусгаарлан байрлуулна.
Шашны холбогдолтой зүүлт, сахиус зэргийг авч ирэхгүй байх хэрэгтэй. Хэрэв нэгэнт төвд авч ирсэн бол бясалгал зохион байгуулагчдад мэдэгдэж тэдэнд хадгалуулж болно.
Үнэт эд зүйлсийг найдвартай хадгалах нөхцөл байхгүй учраас бясалгалд суухаар ирэхдээ авч ирэхгүй байхыг зөвлөе. Хэрэв нэгэнт авч ирсэн бол бясалгалын зохион байгуулагчдад мэдэгдэж хадгалуулах нь зүйтэй.
Бясалгалд суухаар ирэгсэд өөрийн өдөр тутмын хэрэглээний оо, шүйдний сойз, саван, алчуур, шумуул үргээгч, хөнжил гудас, цагаан хэрэглэл гэх мэт зүйлүүдээ авч ирсэн байх шаардлагатай.
Манай улсын хуульд хар тамхи биедээ авч явах, хэрэглэхийг хатуу хориглодог. Энэ төрлийн зүйлсийг бясалгалын төв дээр авч ирэх ч хориотой. Хэрэв ямар нэгэн эмчийн заавраар эм уух шаардлагатай байгаа бол багшдаа заавал мэдэгдэх ёстой.
Бясалгалын төв дээр тамхи татах, хамрын тамхи хэрэглэхийг хатуу хориглоно.
Биед эвтэй, даруу хувцаслахыг эрхэм болгоно уу! Цээж нуруу ил гарсан хувцас, богино өмд, банзал өмсөх нь халууны улиралд ч зөвшөөрөгдөхгүй болохыг анхаарна уу. Наранд биеэ шарах нь төв дээр хориотой зүйлийн нэг юм.
Бясалгагчид нийтийн байранд амьдарч бясалгал хийх тул тогтмол усанд орж цэвэр хувцаслан элдэв үнэртэн хэрэглэхгүй байх шаардлагатай.
Бясалгалын туршид бясалгагчид төвийн байрнаас гадагш гарч болохгүй. Утсаар ярих, захиа бичих, хүнтэй уулзах бясалгалын туршид хориотой. Хэрэв зайлшгүй шаардлагаар гаднаас хүн ирсэн тохиолдолд зохион байгуулагчид эхлэн уулзаж шаардлагатай бол зөвшөөрөл олгоно. Мөн бясалгалын зохион байгуулагчдаас бусад хүмүүс ажилчидтай ч ярих хориотой.
Бясалгалын төвд олон улс орны, олон хүн ирж бясалгадаг тул бүх хүний сэтгэлд нийцсэн хоол бэлтгэх боломжгүй байдаг. Энгийн махгүй хоолоор бясалгалын турш үйлчлэх бөгөөд хүн бүрээс үүнтэй зохицохыг хүсэх байна. Хэрэв хоолны тусгай дэглэм, онцгой хүсэлттэй бол анх бүртгүүлэх үедээ бясалгалын зохион байгуулагчдад мэдэгдэнэ үү!
Зөвхөн багшийн зөвшөөрлөөр хийгдэнэ.
Гадаадаас бясалгалд суухаар ирсэн хүмүүс бясалгалын туршид Монголд байхад хүчинтэй паспорт визтэй байх хэрэгтэй. Мөн бясалгал эхлэх үед бүртгүүлэх шаардлагатай.
Ариун номын бясалгалыг заахад үнэ хөлс авахгүй. Байр зохион байгуулалт, ажилчдын хөлс, тээврийн зардал, татвар, ус, хоол цахилгаан болон бусад зардал урьдын бясалгагчдын номын хандив, өглөгөөр төлөгддөг бөгөөд бясалгалын төв нь өөр ямар нэгэн орлогын эх үүсвэргүй билээ. Бясалгалын төвийн барилга байгууламж нь мөн л өглөг хандиваар баригддаг юм. Цаашдын бүх үйл ажиллагаа энэ л маягаар явагдах болно.
Ариун номын уламжлалын дагуу бясалгалын төв нь зөвхөн бясалгал хийж түүний үр өгөөжийг хүртэн цаашид олон хүнд хүртээн дэлгэрүүлэх үйлсэд хувь нэмэр оруулах гэсэн ариун сэтгэлтэй хүмүүсийн өргөсөн их бага өглөгийг хүлээн авч түүнийгээ зөвхөн бясалгал зохион байгуулахад л зориулдаг юм. Тийм ч учраас бясалгалд анхлан сууж байгаа хүмүүсээс өглөг авдаггүй. Харин бясалгал дууссаны дараа буяны сэтгэлээр өглөг өргөж болно.
Дээр дурьдсан дүрмүүдийн аль нэг нь эсвэл нилээд хэд нь таалагдахгүй, ойлгомжгүй байвал өөртөө эргэлзээгээ хадгалж буруу зүйл хийхээс сэргийлэн нэн даруй багштай болон зохион байгуулагчидтай уулзан тодруулга авна уу!
Эцэст нь сануулахад Випашяна бясалгалын замд амжилт гаргах нь таны буян паарами хийгээд таны чин зүтгэл, итгэл бишрэл, үнэнийг эрхэмлэх, ойлгох билгүүн зэрэг хүчин зүйлс таньд хэр зэрэг хөгжсөнөөс шалтгаална.
Дараахи цагийн хуваарь нь бясалгалыг тасралтгүй үргэлжлүүлэн амжилтанд хүргэхэд чиглэгдсэн байдаг бөгөөд бясалгагчид түүнийг чандлан мөрдөх хэрэгтэй.
